صحت اور خاندانی بہبود کے مرکزی وزیر جناب جگت پرکاش نڈا نےجنیوا میں 79 ویں عالمی صحت اسمبلی کے دوران ’صحت میں مصنوعی ذہانت: قوانین ، اخلاقی نگرانی ، تحقیق اور مساوات‘ کے موضوع پر ایک ضمنی اجلاس سے خطاب کیا ۔
عالمی رہنماؤں ، مندوبین ، ماہرین اور پالیسی سازوں کے باوقار اجتماع سے خطاب کرتے ہوئے جناب نڈا نے صحت کی دیکھ بھال کے نظام ، حکمرانی کے فریم ورک ، معیشتوں اور دنیا بھر کے شہریوں کی زندگیوں کو نئی شکل دینے میں مصنوعی ذہانت (اے آئی) کی تبدیلی کی صلاحیت پر روشنی ڈالی ۔ انہوں نے زور دے کر کہا کہ اگرچہ مصنوعی ذہانت صحت کی دیکھ بھال کی فراہمی کو آگے بڑھانے کے لیے بے پناہ مواقع پیش کرتی ہے ، لیکن اسے ’ٹھوس ضابطے ، سخت تحقیق ، اخلاقی نگرانی اور مساوات کے لیے گہری وابستگی کے ذریعے تشکیل دیا جانا چاہیے تاکہ اس کے فوائد ہر شہری تک پہنچ سکے‘‘ ۔
مرکزی وزیر صحت نے کہا کہ ہندوستان نے ایک دہائی قبل وزیر اعظم جناب نریندر مودی کی دور اندیش قیادت میں 2015 میں ڈیجیٹل انڈیا پہل کے آغاز کے ذریعے ایک مضبوط ڈیجیٹل نظام کی بنیاد رکھی تھی ۔ انہوں نے کہا کہ اس پہل کا مقصد ’ہندوستان کو ڈیجیٹل طور پر بااختیار معاشرے اور علمی معیشت میں تبدیل کرنا ، ہندوستان کو اے آئی سمیت مستقبل کی ٹیکنالوجیز کے لیے تیار کرنا ہے‘ ۔
جناب نڈا نے اس بات پر مزیدزور دیا کہ ہندوستان کی 2017 کی قومی صحت پالیسی نے ایک مربوط، باہم قابل عمل، جامع اور قابل توسیع ڈیجیٹل صحت کے نظام کا تصور پیش کیا تھا۔ اسی وژن کو آگے بڑھاتے ہوئے حکومت نے 2021 میں آیوشمان بھارت ڈیجیٹل مشن کا آغاز کیا، ساتھ ہی رضامندی پر مبنی ڈیجیٹل صحت کے ڈیٹا کے فریم ورک بھی متعارف کرائے، جس کے ذریعے معیاری صحت کے ڈیٹا کی تیاری ممکن بنائی گئی۔
مرکزی وزیر صحت نے زور دے کر کہا کہ بہتر صحت کے نتائج حاصل کرنے کے لیے صرف ڈیجیٹائزیشن اور اعدادوشمار کافی نہیں ہیں، بلکہ اے آئی کے محفوظ اور ذمہ دارانہ استعمال کے لیے گورننس فریم ورک کا مخصوص شعبہ ضروری ہے۔ اس تناظر میں انہوں نے فروری 2026 میں انڈیا اے آئی امپیکٹ سمٹ کے دوران ہندوستان کے لیے صحت کے شعبے میں اے آئی کی حکمت عملی(ایس اے ایچ آئی) کے آغاز کو اجاگر کیا۔
انہوں نےایس اے ایچ آئی(ساہی) کو’’گلوبل ساؤتھ سے ابھرنے والی پہلی جامع حکمت عملی‘‘ قرار دیا ،جو ہندوستان کے صحت کے سفر کو اخلاقی، شفاف اور عوام پر مرکوز رہنمائی فراہم کرتی ہے۔
ہندوستان کے منفرد پیمانے اور تنوع کو اجاگر کرتے ہوئے مرکزی وزیر نے کہا کہ ملک 1.4 بلین شہریوں کے لیے 22 سرکاری زبانوں اور صحت کی سہولیات تک مختلف سطحوں پر رسائی کے ساتھ اے آئی کو منظم کر رہا ہے۔ انہوں نے خبردار کیا کہ اگرچہ اے آئی صحت کی سہولیات کے خلا کو پر کرنے کی صلاحیت رکھتا ہے، لیکن اگر اسے ذمہ دارانہ انداز میں ڈیزائن نہ کیا جائے تو یہ عدم مساوات کو مزید بڑھا بھی سکتا ہے۔
اس چیلنج سے نمٹنے کے لیے جناب نڈا نےبی او ڈی ایچ — بینچ مارکنگ اوپن ڈیٹا پلیٹ فارم فار ہیلتھ اے آئی — کے قیام کا ذکر کیا، جو اس بات کو یقینی بناتا ہے کہ ہندوستان میں نافذ کیے جانے والے اے آئی حل حقیقی دنیا کے ڈیٹا سیٹس کے مطابق جانچے جائیں تاکہ وہ ہر ہندوستانی کے لیے ہر جگہ محفوظ اور منصفانہ انداز میں کام کریں۔
مرکزی وزیر صحت نےزیادہ سے زیادہ بین الاقوامی تعاون کی اپیل کرتے ہوئے کہا کہ کوئی بھی ملک اے آئی کے چیلنجز اور مواقع سے تنہا نمٹ نہیں سکتا۔ انہوں نے قابل اعتماد اور باہم مربوط صحت کے ڈیٹا نظام کو مضبوط بنانے، مشترکہ تحقیق کو فروغ دینے، اخلاقی اے آئی کی ترقی کو آگے بڑھانے اور صحت کے مشترکہ چیلنجز سے اجتماعی طور پر نمٹنے کے لیے ہندوستان کے عالمی شراکت داروں کے ساتھ کام کرنے کے عزم پر زور دیا۔
جناب نڈا نے زور دیا کہ جدت کو ضابطہ کاری کی رہنمائی میں ہونا چاہیے، وسعت کو اعتماد کے ذریعے حاصل کیا جانا چاہیے اور تکنیکی ترقی کو مساوات، اخلاقیات اور عوامی بھلائی سے جڑا رہنا چاہیے۔
اپنے خطاب کے اختتام پر مرکزی وزیرصحت نے کہا کہ صحت کے شعبے میں اے آئی کا مستقبل صرف الگورتھمز کے ذریعے نہیں بلکہ حکومتوں، اداروں اور معاشروں کے اجتماعی فیصلوں کے ذریعے طے ہوگا۔ وزیر اعظم جناب نریندر مودی کے وژن کا حوالہ دیتے ہوئے انہوں نے کہا کہ ہندوستان صرف ’’مصنوعی ذہانت‘‘ پر نہیں بلکہ ’’جامع اور ہمہ گیر ذہانت‘‘ پر یقین رکھتا ہے۔ وزیر موصوف نے عالمی برادری سے اے آئی کو عالمی بھلائی کے لیے طاقت کا ایک ذریعہ بنانے کی اپیل کی۔
Mohammad Shams Aghaz is an Urdu journalist and media professional based in Delhi with over a decade of experience across print, digital, and broadcast newsrooms. He holds an MA in Urdu from Jamia Millia Islamia and a Diploma in Journalism & Mass Communication. At StudioX News Urdu, he covers immigration, settlement, community life, and public-interest stories for Canada's Urdu-speaking diaspora.
