کینیڈین آرمڈ فورسز ڈے: وزیراعظم کارنی کا فوجی اہلکاروں کو خراجِ تحسین
اوٹاوا: Mark Carney نے کینیڈین آرمڈ فورسز ڈے کے موقع پر اپنے پیغام میں ملک کی مسلح افواج کے اہلکاروں کو خراجِ تحسین پیش کرتے ہوئے کہا ہے کہ بدلتی ہوئی اور زیادہ خطرناک عالمی صورتحال میں کینیڈا کی مسلح افواج کے جوان بدستور ملک کی خودمختاری کے دفاع، شہریوں کے تحفظ اور قومی سلامتی کو یقینی بنانے کے لیے اپنی ذمہ داریاں نبھا رہے ہیں۔اپنے بیان میں وزیراعظم نے کہا کہ آج کا دن ان تمام مرد و خواتین کو خراجِ عقیدت پیش کرنے کا دن ہے جو جرأت اور امتیاز کے ساتھ ملک کی خدمت کر رہے ہیں، بشمول وہ افراد جنہوں نے اپنی جانوں کا نذرانہ پیش کیا۔انہوں نے کہا کہ موجودہ حکومت نے غیر معمولی تیزی اور بڑے پیمانے پر اقدامات کرتے ہوئے کینیڈین آرمڈ فورسز کی ازسرِ نو تعمیر، اسلحہ بندی اور سرمایہ کاری کے عمل کو آگے بڑھایا ہے۔ وزیراعظم کے مطابق حکومت نے مسلح افواج کے ہر رکن کی تنخواہوں میں اضافہ کیا، جو ایک نسل کے دوران سب سے بڑا اضافہ ہے۔وزیراعظم کارنی کا کہنا تھا کہ فوجی اہلکار ملک کی خودمختاری، آزادیوں اور اتحادیوں کے تحفظ کے لیے ہمہ وقت تیار رہتے ہیں اور اپنی جانوں کو خطرے میں ڈال کر دوسروں کی مدد کرتے ہیں، اس لیے ان کی تنخواہیں ان کی ذمہ داریوں کے مطابق ہونی چاہئیں۔انہوں نے مزید کہا کہ حکومت نے جدید کینیڈین تاریخ میں دفاعی اخراجات میں سب سے بڑا اضافہ کیا ہے اور 2035 تک نیٹو کے نئے دفاعی سرمایہ کاری ہدف کے مطابق اخراجات کو پانچ فیصد تک لے جانے کے راستے پر گامزن ہے۔ انہوں نے بتایا کہ آئندہ دہائی کے اختتام تک مجموعی دفاعی اخراجات کو جی ڈی پی کے چار فیصد تک پہنچانے کے لیے مالی منصوبہ بندی پہلے ہی کی جا چکی ہے۔وزیراعظم کے مطابق نئی ڈیفنس انویسٹمنٹ ایجنسی اور کینیڈا کی پہلی دفاعی صنعتی حکمت عملی کے ذریعے مسلح افواج کو جدید آلات اور وسائل فراہم کیے جا رہے ہیں تاکہ وہ اپنی ذمہ داریاں مؤثر انداز میں انجام دے سکیں۔اپنے پیغام میں انہوں نے کہا کہ جب لوگ کسی وردی پر میپل لیف کا نشان دیکھتے ہیں تو انہیں امید اور تحفظ کا احساس ہوتا ہے، کیونکہ کینیڈین آرمڈ فورسز کے اہلکار ہر لمحہ ملک کی خودمختاری اور سلامتی کے لیے خدمات انجام دے رہے ہیں۔انہوں نے مزید کہا کہ کینیڈا کی خودمختاری اور سلامتی خود بخود حاصل نہیں ہوتیں بلکہ انہیں مسلح افواج کے اہلکار روزانہ کی بنیاد پر یقینی بناتے ہیں۔ ایک زیادہ خطرناک اور تقسیم شدہ دنیا میں ان کی خدمات اور قربانیاں پہلے سے کہیں زیادہ قابلِ قدر ہیں۔وزیراعظم نے اپنے پیغام کے اختتام پر کہا کہ مسلح افواج کے اہلکاروں کی خدمات، اقدار اور قوت کینیڈا کی بہترین عکاسی کرتی ہیں، اور ملک بھر سمیت دنیا کے مختلف حصوں میں خدمات انجام دینے والے تمام اہلکاروں کو قوم کی جانب سے شکریہ پیش کیا۔
Mohammad Shams Aghaz is an Urdu journalist and media professional based in Delhi with over a decade of experience across print, digital, and broadcast newsrooms. He holds an MA in Urdu from Jamia Millia Islamia and a Diploma in Journalism & Mass Communication. At StudioX News Urdu, he covers immigration, settlement, community life, and public-interest stories for Canada's Urdu-speaking diaspora.
