عالمی یومِ انسدادِ تمباکو نوشی: کینیڈا کا تمباکو اور ویپنگ کے خلاف اقدامات مزید سخت کرنے کا اعلان
اوٹاوا: عالمی یومِ انسدادِ تمباکو نوشی کے موقع پر کینیڈا کی وزیر صحت مارجوری مشیل نے کہا ہے کہ تمباکو نوشی اب بھی کینیڈا میں بیماریوں اور قبل از وقت اموات کی ایک بڑی اور قابلِ تدارک وجہ ہے، جس کے نتیجے میں ہر سال تقریباً 46 ہزار کینیڈین شہری اپنی جانوں سے ہاتھ دھو بیٹھتے ہیں۔
وزیر صحت کی جانب سے جاری بیان میں کہا گیا کہ تمباکو نوشی کے علاوہ دوسرے افراد کے سگریٹ کے دھوئیں (Second-hand Smoke) سے بھی سنگین صحتی مسائل پیدا ہوتے ہیں، جو سالانہ تقریباً ایک ہزار اموات کا سبب بنتے ہیں۔ بیان کے مطابق بچوں اور شیر خوار بچوں کو اس دھوئیں سے سب سے زیادہ خطرات لاحق ہوتے ہیں۔
مارجوری مشیل نے کہا کہ عالمی یومِ انسدادِ تمباکو نوشی سے قبل کینیڈا کی حکومت عوام کو تمباکو اور نکوٹین سے بنی مصنوعات کے مضر اثرات سے محفوظ رکھنے اور صحت سے متعلق باخبر فیصلے کرنے میں مدد فراہم کرنے کے اپنے عزم کا اعادہ کرتی ہے۔
انہوں نے بتایا کہ اس سال عالمی یومِ انسدادِ تمباکو نوشی کا موضوع “کشش کا پردہ فاش کرنا، تمباکو اور نکوٹین کی لت کا مقابلہ کرنا” رکھا گیا ہے، جس کا مقصد تمباکو اور نکوٹین مصنوعات کے ڈیزائن اور ان کی ظاہری کشش کے ذریعے صارفین، خصوصاً نوجوانوں کو راغب کرنے کی حکمت عملیوں کو بے نقاب کرنا ہے۔
وزیر صحت کے مطابق کینیڈا تمباکو مصنوعات کی پیکجنگ اور لیبلنگ کے حوالے سے دنیا کے صفِ اول کے ممالک میں شمار ہوتا ہے۔ انہوں نے کہا کہ 2023 میں کینیڈا دنیا کا پہلا ملک بنا جس نے ہر سگریٹ پر براہِ راست صحت سے متعلق انتباہی پیغامات درج کرنا لازمی قرار دیا۔ اس کے ساتھ ساتھ سگریٹ کے پیکٹوں پر نئے گرافک انتباہات اور تمباکو نوشی ترک کرنے سے متعلق پیغامات بھی متعارف کرائے گئے تھے۔
بیان میں کہا گیا کہ آنے والے ہفتوں میں سگریٹ کے پیکٹوں پر صحت سے متعلق انتباہی پیغامات کی نئی کھیپ متعارف کرائی جائے گی، جس کا مکمل نفاذ یکم اگست 2026 تک کر دیا جائے گا۔
کینیڈین حکومت نے تمباکو نوشی اور ویپنگ کے رجحان کو کم کرنے کے لیے متعدد اقدامات کیے ہیں۔ وزیر صحت نے کہا کہ ٹوبیکو اینڈ ویپنگ پروڈکٹس ایکٹ کے تحت نوجوانوں کو تمباکو اور ویپنگ مصنوعات تک رسائی سے روکنے اور لوگوں کو سگریٹ نوشی ترک کرنے میں مدد دینے کے لیے عملی اقدامات جاری ہیں۔
انہوں نے بتایا کہ کینیڈا کی تمباکو حکمتِ عملی کے آغاز کے بعد اس شعبے میں نمایاں پیش رفت ہوئی ہے۔ تازہ اعداد و شمار کے مطابق ملک میں صرف 13 فیصد افراد نے گزشتہ 30 دنوں کے دوران کسی نہ کسی تمباکو مصنوعات کے استعمال کی اطلاع دی ہے۔
وزیر صحت کے مطابق نوجوانوں میں سگریٹ نوشی کی شرح تاریخ کی کم ترین سطح پر پہنچ چکی ہے اور اب یہ 2 فیصد سے بھی کم رہ گئی ہے۔ اسی طرح نوجوانوں میں ویپنگ کے استعمال میں بھی مسلسل کمی ریکارڈ کی جا رہی ہے، جو حکومت کی انسدادی پالیسیوں کی کامیابی کا ثبوت ہے۔
مارجوری مشیل نے ان افراد کو بھی پیغام دیا جو سگریٹ نوشی یا ویپنگ ترک کرنا چاہتے ہیں۔ انہوں نے کہا کہ حکومت کی جانب سے مفت اور خفیہ معاونت کی سہولت فراہم کی جا رہی ہے۔ اس مقصد کے لیے کینیڈا بھر میں ٹول فری “کوئٹ لائن” سروس دستیاب ہے، جہاں ماہرین لوگوں کو تمباکو نوشی اور ویپنگ چھوڑنے میں مدد فراہم کرتے ہیں۔
وزیر صحت نے اس عزم کا اظہار کیا کہ حکومت تمباکو اور نکوٹین کے مضر اثرات کے خلاف اپنی کوششیں جاری رکھے گی اور ایک ایسے معاشرے کے قیام کے لیے کام کرے گی جہاں آنے والی نسلیں صحت مند زندگی گزار سکیں۔
انہوں نے اپنے بیان کے اختتام پر کہا کہ “ہم سب مل کر تمام کینیڈین شہریوں کے لیے ایک صحت مند اور محفوظ مستقبل کی تعمیر کر سکتے ہیں۔”
Mohammad Shams Aghaz is an Urdu journalist and media professional based in Delhi with over a decade of experience across print, digital, and broadcast newsrooms. He holds an MA in Urdu from Jamia Millia Islamia and a Diploma in Journalism & Mass Communication. At StudioX News Urdu, he covers immigration, settlement, community life, and public-interest stories for Canada's Urdu-speaking diaspora.
